"Гадзіна Зямлі" — гэта міжнародная акцыя, падчас якой Сусветны фонд дзікай прыроды заклікае выключыць святло і бытавыя электрапрыборы на адну гадзіну ў знак неабыякавасці да будучыні планеты. У гэты ж час згасае падсвятленне самых вядомых будынкаў і помнікаў свету. Сёлета акцыя пройдзе ў Беларусі ўжо 15-ы раз. Мэта акцыі не ў тым, каб зэканоміць электрычнасць, гэта сімвал беражлівых адносін да прыроды. З году ў год мерапрыемства дазваляе прыцягнуць увагу да неабходнасці адказных адносін да прыроды.

    Сёння "Гадзіна Зямлі" - гэта самая масавая экалагічная акцыя на планеце. Беларусь не застаецца ўбаку. Так, толькі ў Мінску традыцыйна адключаецца падсветка такіх знакавых аб'ектаў, як Нацыянальная бібліятэка, Нацыянальны акадэмічны Вялікі тэатр оперы і балета, Беларуская дзяржаўная філармонія, Нацыянальны мастацкі музей, Беларускі дзяржаўны музей гісторыі Вялікай Айчыннай вайны, а таксама падсветка ЦУМа, гандлёвага цэнтра "Сталіца" , гасцініцы «Беларусь» і інш.

    Паколькі гэта абсалютна добраахвотная акцыя, людзі самі вырашаюць, колькі і якія электрычныя прыборы яны выключаць. Арганізатары акцыі ў мэтах бяспекі не рэкамендуюць адключаць вулічнае асвятленне, аэранавігацыйныя агні і святлафоры.

    Выключыць святло на гадзіну вельмі проста, але нават за такім сімвалічным дзеяннем варта магчымасць дапамагчы планеце, змяніўшы свае штодзённыя звычкі.

    Як? Напрыклад, эканомна расходаваць электраэнергію і цяпло, беражліва адносіцца да вады і зрабіць выбар на карысць другаснай перапрацоўкі паперы і іншых матэрыялаў, тым самым скарачаючы выкіды парніковых газаў.

    "Гадзіна Зямлі" - толькі малы ўклад у агульную справу, якую кожны з нас можа зрабіць. Клапаціцца аб экалогіі трэба кожны дзень і кожную гадзіну. Ад беражлівых адносін да прыроды залежыць наша будучыня. Падарым час прыродзе і яна адплаціць нам у шмат разоў больш.